一般人心目中ｅ幸福男性，就是hit款02會凍di暗時八點左右就食飯飽；閣若拭嘴箍若對di灶腳準備veh洗碗ｅ太太講一寡無事屎ｅ話語03ｅ人："非常多謝，太太！英暗04ｅ菜卡實好食！…噢！Mr.Bush I Love You."一頓滿足ｅ暗頓gah報紙頂面有人稱呼台灣做 "Republic of Taiwan"伊就歡喜gah會飛天鑽地。

遵照zit款05標準，我的確是一個幸福ｅ人。婚姻生活16年來，阮某就是hit款將灶腳當做是"四行倉庫"ｅ人，若無戰gah剩"一兵一卒"(冰箱空無一物)，絕無輕言"食餐廳"。 因為，對伊來講；親像"想veh食啥？"zit款問題，一直是比"想veh煮啥？"閣卡困難回答。我若是起毛qiang06，想veh 送小心07 ho伊，只要大方ｅ對伊講："太太，英暗咱來食外口！"。當然，百分之 99 伊攏是這般回答：

"免啦！米已經洗好啊，閣炒二個菜，就會凍08食飯啊！"。

然後就抱著歡喜ｅ心情，繼續di灶腳內底，弄刀使火；我一角錢都免開，好人做di嘴下hai (額)。

過著如此ｅ生活，自然無相信中年危機會ziah早就來。只是，最近若ho上司cue去討論"年度計劃"，攏會真鬱卒：

"明年咱veh做啥麼？"

聽著按呢ｅ問題，心內真想veh應 "我奈會知？"只是"君子愛財，取之有道"只好將"科技新聞"報導ｅ內容，真青疏ｅdi"頭家"面前閣背一擺：

"噢…我想…奈米…可能袂vai，嗯…若是kng 久09，可能會暴芽10，是藍色ｅ…※＃％…"

PS: 聽講用奈米技術飼ｅ豬仔，放屎袂臭。藍芽會凍"無線上網"。

阮頭家聽著是藍色ｅ就轉歡喜，講"不管是白米或是烏米，只要財務報表是藍色ｅ，就是好計劃。就按呢11，照計劃進行吧！"這…，就是新年度ｅ開始。

王寶釧di 武家坡苦守寒窯18冬就會凍變做是賺人目屎ｅ戲劇；但是，無人認為di辦公室ｅ冷氣房食頭路 20 年有啥麼了不起。阮老父講伊ｅ同事di車站票口剪票35 年，到伊退休hit日，伊將剪票莢仔送ho收"歹銅舊錫"ｅ人。

自細漢，就認為用功讀冊是唯一ｅ出路；只要通過考試就會凍做公務人員。阮老母定定ga大姊講"去鎮公所上班，無代誌就刺蓬紗衫閣有薪水領，未vai啊啦！"因此，我ｅ人生信念就是 讀冊 - 考試 - 閣讀冊 - 再考試，散鄉人12若veh 鹹魚bing身13，就是去食公家。如今，我雖然是食私人機關ｅ頭路，但是hit款信念像 mo-ki 14 仝款，時常moh di心肝頭15，恬恬吸盡"青春ｅ夢想"。

所以，雖然是幸福ｅ生活，ma 有hit 款想veh 講 "老子不幹了"ｅ衝動；而且，一日比一日嚴重。但是，無論我心情怎樣變化，每日di 灶腳ｅ運作，一直攏真正常；時間若到，好食ｅ暗頓，猶原會ui hia 16一個一個捧出來。為著veh掩kam心情ｅ鬱卒，同時配合"烘虱目魚肚"ｅ菜色，一杯白葡萄酒落腹是免不了ｅ代誌。茫茫中，我開始懷疑家己ｅ地位，我敢是"賺錢ｅ機器"耳耳？尪婿敢比未過灶腳hia ｅ鼎鍋仔？伊用全力deh luh 鍋仔蓋ｅ垃圾17，奈會全無看顧我心內一點仔ｅ空虛咧？伊煮飯ho 我食，gah我駛車去加油站加油有何不同？(加油站加油gah di 阮兜食飯飽，攏有送面紙。)

飯後幾分酒意，所想ｅ代誌，自然是對灶腳ｅ疾妒。電影內底，灶腳是hit款無顧一切，拚命製造"激情"ｅ所在 (注：請參考"愛你九週半")。但是，阮兜ｅ灶腳卻是充滿理性gah理想主義ｅ所在。di hit內底，我若是有gah製造食物無關連ｅ行為，攏會得著 "你ma幫幫忙！veh害我撞破碗是無？"蓋成18碗比人卡重要。

到底是啥麼物件ho女性對灶腳如此ｅ死忠，而完全無顧男性"睾酮素"ｅ作怪咧？我想，這就是灶腳神祕ｅ所在。過去，阮老母攏無愛ho阮食雞腳，講啥麼食了會qau裂破冊19，所以逐擺攏會凍看伊滿心喜足坐di躺椅吮雞爪仔。孔子講"君子遠庖廚"，卻是愛in 某將豬肉切ho四正四正，才會感覺好食。無定著20 hit句"君子遠庖廚"是孔子in某ｅ主張呢！女性想veh 完全掌握灶腳ｅ企圖，di 孔子時代就真明顯啊！為著veh掌握美妙ｅ事務而出言恐嚇、警告是政治上常用ｅ手腕；Cua 狗仔散步21，伊會四界烏白放尿，ma 是仝款ｅ道理。

我有幾個朋友，因為無仝款ｅ理由提早退休。但是in攏得著一個仝款ｅ結論，就是時間siunn 濟22。雖然有人愛爬山，有人愛釣魚，但iah 是逃袂過時間siunn 濟ｅ折磨。阮老父ui公路局退休差不多有20年啊，除了去鴨母寮仔gah人buah 衛生麻雀23以外，全然失去生活ｅ動機。有時請in退休ｅ同事來厝食飯，真濟人圍di飯廳話虎lan24兼怨天怨地，講啥麼若ho in閣少年40冬，BUS m駛veh駛戰車。但是，di 灶腳無閒煮菜ｅ老母，雖然有一甲 (60) 年以上ｅ煮食經驗，iah是大小粒汗cap-cap 滴，gana25 希望伊煮ｅ菜會得人呵咾，無ho老父漏氣。

不管是啥麼職務，攏有結束退休ｅ時陣。但是，灶腳ｅ工缺26，好親像只要雙腳閣會徛27，雙手閣會動，就無法度停止。因此，若無參加灶腳ｅ股份，男性就必須面對職務ｅ結束或是變化gah完全對家務外行ｅ雙重壓力。有一日，阮某無di厝，我必須留di厝內顧囡仔28；當然，上重要就是愛款待in食飯。經過久長ｅ思考gah觀察，我veh推翻孔子ｅ思想，剝下"君子"ｅ面具，無顧巷仔口"阿英仔麵店"ｅ生利29，決定將我ｅ腳步徒入灶腳，尋回"失落ｅ帝國"。

彼暗，我面對半碗ｅ豆醬30，3 粒強強veh爛去ｅ甘仔蜜31，二塊豆腐，一粒高麗菜，一塊iah袂退冰ｅ雪魚。我cue 32 無蔥仔，gana 有發芽ｅ蒜頭。拍開額頭櫃，一罐一罐ｅ玻璃罐仔，有冬冬in兜ｅ"薑仔酒"，有主婦聯盟ｅ"冷壓芝麻油"，有烏、白醋…有東…有西。我六點開始，為著veh自我挑戰，設定di七點以前必須完成。一點鐘以後，我捧出一鍋 "柑仔蜜豆腐ｅ豆醬湯"，一pet "蒜爆雪魚"gah一盤"炒高麗菜"。"來食飯仔噢！"我真歡喜叫阮彼二個後生來食。大漢先食魚，細漢ｅ去添飯。"爸比，飯攏是水！"抵deh怨嘆電鍋無插電zit個失誤ｅ時，閣聽著大漢ｅdi飯聽嘩休"爸a，魚仔攏cen袂落，中央閣冰冰！"。最後，iah是去"阿英仔麵店"叫三碗魯肉飯，才解決zit場混亂ｅ局面。但是，皇天不負苦心人；Hit 暗，阮某ui 外口轉來33，因為lim 彼鍋加料 (薑仔酒) ｅ豆醬湯，食gah面色紅gong-gong，腹肚閣無膨風，所以對我特別溫柔。古早人講"好心ho某zim"一點仔就無意外啦。

Ui zia34，咱完全會凍看出veh主持灶腳事務ｅ人，自然m是"等閒之輩"；伊需要有智慧、勇氣、體力、冷靜、堅持、歸納ｅ能力、美學ｅ修養、基督徒奉獻ｅ精神gah 好酒量；這差不多gah選台灣總統ｅ條件仝款。所以，"輸人m輸陣，輸陣就歹看面"；現代君子 (男性) 應該勇敢ｅ徛起來，向太太索求應得ｅ"灶腳ｅ股份"；至少，愛gah di 公司deh搶股票仝款ｅ拍拚。